Converso

As Conversos (Pl. vo Converso) het mä im spanische und bortugiisische Sproochruum Juude bezäichnet, wo zum katholische Christedum konwertiert häi, und deren iiri Noochkomme. De Konwertite us dr maurische Bevölkerig, wo vom Islam zum Katholizismus konwertiert häi, het mä Moriscos (uf Dütsch: Moriske) gsäit.

Zerst häi d Conversos scho nume wägen iirem Akt vo dr Waal as usgezäichneti Christe gulte. In de mäiste Fäll het d Konwersioon aber under Zwang stattgfunde und d Conversos si vilmol under em Verdacht gstande, ass si Krüptojuude sige und iiri alti Religioon witer wurde usüebe. Vom 13. Joorhundert aa isch en Antisemitismus gege die Nöi-Christe (cristianos nuevos span. / cristãos novos port.) ufchoo. Die Spannige, wo au vo wirtschaftlige Inträsse vo de Alt-Christe (cristianos viejos span. / cristãos-velhos port.) cho si, si denn am Ändi vom Middelalter zun ere Verfolgig vo de Conversos dur die Spanischi Inkwisizioon worde. Vom 15. bis ins 19. Joorhundert het jeede, wo z Spanie e hööchers Amt het welle iinee, uf en Uniwersidäät het welle go studiere oder eme Orde het welle biidräte, müesse bewiise, ass si Bluet räin sig, das häisst, ass er nit vo Juude oder vo Muslime wurd abstamme.

Converso und Marrano si in dr hütige Forschig die gängige Bezäichnige für Juudeoconversos mir ere iberische Härkumft und deren iiri Noochkomme.