Eucharistie

D Öicharistii („Danksäägig“; griech. εὐχαριστέω eucharistéo ‚Dank sääge‘) oder s Oobemool, auch Herremool, häiligi Kommunion, Altarssakramänt, allerhäiligsts Sakramänt, in e baar Freichillene Brootbräche, in de Ostchille häiligi oder göttligi Liturgii, isch e Sakramänt vom Christedum. D Lithurgii vo dr Öicharistii wird je noch Konfessioon as e Widerholig vom letschte Mool vom Jesus mit sine Jünger, bevor dr Jesus verhafdet und denn krüzigt worde isch, verstande, äntwäder as en unbluetigi Vergegewärtigung vom Opfer am Chrüz oder as e Fiir zur Erinnerig an säll Mool.

Bi dr Öicharistii resp. bim Oobemool wärde s Stärbe und d Uferstejig as Häilseräignis verkündet und vergegewärtigt. Dr Jesus Christus isch drbii gegewärtig in dr Gmäinschaft, wo uf in zruggoot, in sim Wort, im Glaube an iin oder in de Goobe vo Brot und Wii. Die verschiidene Konfessione gseen die Gegewart underschidlig.