Ouija

C'l artìcul chè 'l è scrit in Miranduléś

La Ouija (a s lèś [ˈwiːdʒə] in ingléś) l'è 'n strumènt pìcul druâ p'r al cumunicasiòṅ mediàtichi, invintâ in dla secónda mità dal XIX sécul par gl'americàṅ Elijah Jefferson Bond e Charles Kennard e dvintâ famóś in dla mità dal XX sécul. Da 'l 1991 al sò marchi 'l è pasâ a la Hasbro.

C'l ugèt chè 'l è fat par na tavla lisa, in gènar ad légn o 'd plàstica, e da 'n indicadōr mòbil ch'al gh gira insìma ciamâ planchette. Su la tavla i gh èṅ scrit i nùmar da 0 a 9, al 26 létri d'l alfabē e soquànti paròli cuma sè, nò e arvéd'r-as.

A s trata 'd un strumènt druâ in dal sedùdi spirìtichi par dascórar c'n i mòrt o i dèmun. Al parsòni ch'i dróan l'ouija i fànan dal dmandi a i sugèt ad c'l àtar mónd e pò un medium al fà giràr in na manéra libra la planchette lasànd-as purtàr la maṅ p'r i spìrit ch'i la guìdan par sgnar in sequénsa al létri o i nùmar par furmàr dal paròli e far acsè inténdar qvél ch'i vōlan dir.

Culegamènt estéran

(IT) La ouija su 'l sit Il Post