Telemedicino

Telemedicino estas la uzo de komputilaj kaj telekomunikaj teknologioj por interŝanĝi medicinajn informojn. Ĝi celas provizi de malproksime medicinajn prizorgojn, ĉefe hospitalajn servojn. La termino konsistas el la greka vorto τήλε (tele), kiu signifas malproksima, kaj medicino. Telemedicino povas esti tiel simpla kiel du homoj kiuj pridiskutas medicinan problemon telefone aŭ tiel kompleksa kiel satelita teknologio kaj retkunsida ekipaĵo por realtempa konsultado inter medicinaj specialistoj en du malsamaj landoj. Ĝi povas ankaŭ impliki la uzon de senpilota roboto^[1]. Telemedicino inkluzivas kaj diagnozon kaj kuracadon, kaj ankaŭ medicinan edukadon. Ĝi estas teknologia rimedo, kiu ebligas la optimumigon de sanservoj, ŝparante tempon kaj monon kaj faciligante ricevi specialan sanprizorgon en malproksimaj regionoj. La jenaj servoj de telemedicino estas:

• Tujaj kaj komplementaj servoj al sanprizorgo fare de specialisto (akirante duan opinion).
• Tujaj diagnozoj de faka kuracisto en certa regiono.
• Malproksima edukado de studentoj en flegaj kaj medicinaj lernejoj.
• Ciferecaj arkivaj servoj por radiologiaj ekzamenoj, ultrasonoj kaj aliaj.
• Viva subteno de faka kuracisto.

Telemedicino estas unu el la plej rapide kreskantaj segmentoj de medicino en la mondo (ĉirkaŭ 20% jare)^[2]. La kronvirusa epidemio COVID-19 donis potencan impulson al la disvolviĝo kaj efektivigo de telemedicino en Rusujo kaj ĉirkaŭ la mondo^[3].

1. ↑ (en) Aaron Azerad, Robot Successfully Completes Unassisted Heart Surgery, arĥivita de la originalo, Wayback Maŝino, la 19-an de majo 2016
2. ↑ (ru) Maria Popova, n-ro 95 (6089), la 31-an de majo 2017
3. ↑ (ru) Olga Prosvirova, Telemedicino estis inventita antaŭ longa tempo. La kronaviruso infektis la amasojn per ĝi Telemedicino tra la mondo spertas renaskiĝon: virtualaj kuracistaj rendevuoj sub (mem)izoligaj kondiĉoj estas unu el la plej sekuraj manieroj konsili pacientojn kaj malhelpi la disvastiĝon de la kronaviruso en hospitaloj. ... BBC, la 15-an de aprilo 2020 .  "En marto, laŭ studo de Frost & Sullivan, la nombro de petoj pri retaj konsultoj kreskis je 50%, kaj unuopaj telemedicinaj servoprovizantoj raportis, ke ili komencis ricevi 15 mil pliajn petojn ĉiutage ol antaŭ la pandemio.", alirite la 22-an de aprilo 2020.