Unicorniu

El unicorniu ye una criatura mitolóxica representada davezu como un caballu blancu con pates d'antílope, barba de chivu y un cuernu na frente. Nes representaciones modernes, sicasí, ye idénticu a un caballu, namái estremándose na esistencia del cuernu mentáu.

L'unicorniu ye un animal fabulosu protagonista de numberoses hestories y lleendes. Na Edá Media taba consideráu como un animal fabulosu capaz de ganar a animales más fuertes físicamente, inclusive elefantes.

Esisten trés hipótesis qu'intenten esplicar l'apaición de la lleenda del unicorniu n'Europa:

La primera vien de les esploraciones griega, romana y macedonia na India: esistíen rellatos de criatures d'un solu cuernu, probablemente rinocerontes índicos. Si l'hipopótamu foi llamáu "caballu de ríu" polos esploradores griegos, paez creíble suponer qu'igualmente describiríen a un rinoceronte indiu como un caballu con un cuernu sobre la cabeza.

La segunda provién de los pueblos viquingos que comerciaban nel interior d'Europa cuernu de narval; les primeres representaciones artístiques conocíes d'esti cetaceu nel interior d'Europa yeren similares a un unicorniu marín. Bien probablemente, y yá que el mitu ta documentáu dende l'antigua Grecia, los pueblos nórdicos tan solo aprovecharon la lleenda presistente pa vender caniles de narval como si fueren cuernos d'unicorniu, acomuñaos a tou tipu de propiedaes curatibles.

La tercera tien el so orixe nel recién (el 13 de xunu de 2008) descubrimientu nel parque natural de Prato (Toscana), Italia, nel que s'hai documentáu un corzu con un solu cuernu nel centru. Paez facederu qu'esta peculiaridá produxérase más vegaes a lo llargo de la historia. Na reserva natural de Prato creen qu'un corzu con un solu cuernu, como l'atopáu na so zona, pudo dar orixe al mitu.^[1]

Tamién esisten casos de cabres que nacieron colos cuernos fundíos n'unu solu, ente que n'otros casos, como'l de la cabra Lancelot del ilusionista Oberon Zell, foi manipulada quirúrgicamente, basándose nes investigaciones del biólogu Franklin Dove, por que creciera colos sos dos cuernos fundíos como si fueren unu. A esti tipu de cabres suel llamáse-y popularmente "cabres unicornio". ^[2][3]

Falando de fechos enllazando col primer puntu, fai referencia a la cultura del valle del Indo onde se toparon unos 2000 sellos, que representen tou tipu d'animales de la zona. Na cuarta parte de los 2000 topaos, atopamos grabaos d'animales de cuernu únicu y curvu (como cabía esperar, non rectu); dar por válidu (resalvando estudios alrodiu de la perspeutiva y l'iconografía representativa), una y bones el restu de los grabaos nun tener animales míticos, ye más, esta civilización sumida nun tenía relixón conocida, nin templos nin grandes estatues, polo que se refuguen la mitoloxía, dioses o similares.

1. ↑ «Atopáu un 'unicorniu' na Toscana ( El País )».
2. ↑ http://www.dogguie.net/interesada-cabra-unicorniu/
3. ↑ http://adictamente.blogspot.com.ar/2016/05/lancelot-la cabra-que-queria-ser.html