10 results found for: “Hip_Hop”.

Main result

Hip hop

O hip hop ye un movimiento cultural y un chenero musical que apareixe a prencipios d'os anyos 1970 en as comunidaz hispanoamericanas y afroamericanas d'os vicos d'o Bronx, Queens y Brooklyn de Nueva York. A concepción clasica d'o hip hop se centra en a existencia de cuatre aspectos u "pilars" d'a cultura: o MCing (u rapping), o DJing (u turntablism), o Breakdancing (u BBoying), y o graffiti. Bi ha qui da la mesma importancia a atros pilars como lo beatboxing, l'activismo politico u o disenyo de ropa y complementos. A unión de dos d'istos elementos, o MC (Master of Ceremony, en aragonés "Mayestro de ceremonias", prenunciato /em.'si/ u /'em.si/) y o DJ (Disc Jockey, prenunciato en aragonés /di.'ʝei/ u /'di.ʝei/), conforman o estilo musical d'o hip hop: o rap. O rap, consiste en cantar u parlar parolas rimatas acompanyatas d'un ritmo repetitivo y sincopato. O estilo musical que acompanya a lo MC ye una evolución d'o funk y o breakbeat, que tamién puet estar instrumental. A musica hip hop se caracteriza por a suya ritmica y/u bailabilidat. O turntablism u DJing ye l'arte de creyar musica por meyo de tecnicas con discos de vinilo, como breakbeat, scratch, beat juggling, ecetra. O BBoying ye l'arte de bailar o breakdance. A la persona que practica iste baile li se diz b boy, b girl, fly girl u breaker. Tamién li se diz b-boy/girl a la persona que sigue ista cultura. O graffiti ye a prencipal expresión d'o hip hop en as artes plasticas. Consiste en pintar con pintura en aerosol sobre superficies urbanas como pueden estar muros de cualsiquier material, asinas como trens, puertas, mobiliario urbán y d'atros. O mas común ye que os artistas adediquen as suyas obras a pintar o suyo nombre u sobrenombre. A estetica d'os graffitis ha influito en os cómics (como por eixemplo en The Boondocks) y en o disenyo de ropa, portaladas de discos, y atros obchectos. O tag tien prou relación con l'arte d'o graffiti, os escritors que pintan as suyas obras en o mobiliario urbán gosan sinyar-las con un sinyal personal, o dito tag, pero no siempre van unitos a la obra pintata, se pueden trobar personalizatos sin de relacionar-se con dengún graffiti por as carreras, acción dita taggeyar y, dimpués evolucionata a takeyar por a suya estreita relación con os rotuladors taker con que gosan fer-se istos sinyals. O beatboxing ye a tecnica d'imitar con a boca sonitos de percusión u instrumentos propios d'a musica rap u hip hop.