Kuwait[12] (n'árabe: الكويت), oficialmente Estáu de Kuwait (n'árabe: الكويت) ye un país d'Oriente Mediu. Asitiáu na fastera septentrional de la Península Arábiga, nel estremu del golfu Pérsicu, llenda al norte y al oeste con Iraq y al sur con Arabia Saudita[13]. Amás, comparte frontera marítima con Irán. La costa de Kuwait tien una estensión aprosimao de 500 km[14]. La mayoría de la so población vive na aglomeración urbana formada pola capital, Ciudá de Kuwait[15], y la so área metropolitana. El país tien una población de 4,45 millones d'habitantes; namái 1,45 millones son ciudadanos kuwaitíes, mentantu que los otros trés millones son ciudadanos de casi una centena de países.
Históricamente, la mayoría del actual territoriu kuwaití formaba parte de l'antigua Mesopotamia[16][17]. Primero del descubrimientu de petroleu nel so subsuelu, Kuwait yá yera un puertu comercial nel qu'intercambiábense productos de Mesopotamia, Persia ya India. El petroleu foi descubiertu, en cantidaes comercialmente aprovechables, en 1938, y 1946 foi'l primer añu nel que'l país esportó petroleu[18][19]. De magar, y hasta 1982, el país foi sometíu a un procesu de modernización a gran escala aprovechando'l beneficiu de la esportación petrolífera. Na década de 1980, dempués del crac bursátil del so mercáu de valores, el país esperimentó un periodu d'inestabilidá xeopolítica ya crisis económica. En 1990, dempués de disputes con Iraq rellacionaes cola producción de petroleu, Kuwait foi invadíu, y dempués incorporáu al estáu dirixíu por Saddam Husein como una de les gobernaciones iraquines[20]. La ocupación finó'l 26 de febreru de 1991, dempués d'una intervención militar llevada a cabo por una coalición liderada por Estaos Xuníos y formada por dellos otros países.
La organización política del estáu ye la d'emiratu. L'emir ye'l xefe del estáu; pertenez a la dinastía Al Sabah, que ye la que domina'l sistema políticu del país. La relixón oficial del estáu ye l'Islam, y más concretamente la escuela malikí del Islam suní. Kuwait ye un país en desarrollu con una economía d'altos ingresos, respaldaos poles sextes reserves de petroleu mayores del mundu. La so cultura popular (teatru, radio, música y telenoveles) tien influencia rexonal, y espórtase a los países del Golfu de la so contorna[21].
Kuwai tien el mayor Índiz de Desarrollu Humanu de tol mundu árabe[22][23]. Ye miembru fundador del Conseyu de cooperación pa los Estaos Árabes del Golfu, y forma parte tamién de les Naciones Xuníes, la Lliga Árabe, la Organización de Países Esportadores de Petroleu y la Organización pa la Cooperación Islámica. En xunetu de 2022 el fíu del emir foi nombráu primer ministru pa sustituyir nel cargu al primer ministru interín Sheikh Sabah al-Khalid, que taba perenfrentáu al parllamentu por cuenta d'una reforma fiscal.Historia
© MMXXIII Rich X Search. We shall prevail. All rights reserved. Rich X Search