Liechtenstein, oficialmente Principáu de Liechtenstein[9] (n'alemán: Fürstentum Liechtenstein[10]) ye un microestáu de fala alemana asitiáu na Europa Central. Allugáu al sur del llagu de Constanza, llenda al oeste y al sur con Suiza y al norte y l'este con Austria[11]. L'occidente del país ocupa parte de la llanada del altu Rin, mentantu que la so parte oriental s'esparde peles lladeres de la cordelera del Rätikon (Alpes centrales). Políticamente'l país, el cuartu más pequeñu d'Europa y el sestu más pequeñu del mundu[12], ye una monarquía constitucional dirixida pol príncipe de Liechtenstein.
Tien una estensión de 160 km², nos que viven 38.387 habitantes (2022)[13]. Divídese alministrativamente en 11 conceyos; el mayor d'ellos ye Schaan, y la capital del país ye Vaduz. Económicamente, tien una de les mayores rentes per cápita del mundu axustada por paridá de poder adquisitivu[14], gracies en bona midida al so importante sector financieru. Nún tiempu yera consideráu un paraísu fiscal, pero anguaño yá nun ta incluyíu en denguna llista negra de paraísos fiscales. Otra fonte d'ingresos pal país ye'l turismu invernal.
El país ye miembru de les Naciones Xuníes, l'Asociación Europea de Llibre Comerciu ya'l Conseyu d'Europa. Magar que nun ye miembru de la Xunión Europea, porque esta nun foi creada col envís d'incluyir ente los sos miembros a los microestaos, participa tanto del espaciu Schengen como del Espaciu Económicu Européu. Tien, amás, una xunión aduanera y monetaria con Suiza, de forma que'l francu suizu ye la so moneda.
© MMXXIII Rich X Search. We shall prevail. All rights reserved. Rich X Search