Antonio Vivaldi

Der Artikl is im Dialekt weanarisch (HC Artmann schreibweis) gschriem worn.

Da Antonio Lucio Vivaldi (* 4. meaz 1678 in Venedig; † 28. juli 1741 in Wean) woa r a venezianischa komponist und violinist. Ea is ana fo de gresdn barockkomponistn. Sei bekauntesdes weak haasst Via Joareszeidn, des is a serie vo violinkonzeatn.

Fom Vivaldi san fosd 500 konzeate dahoedn, 241 dofon san fiad violin ois soloinstrument, wos an oba ned wundat, wäu a jo söba r a geiga woa.

Vamuatlich, wäu si da publikumsgschmock gendat hod und ea a bissl aus da mode kumman is, is a 1740 noch Wean emigriad, wo a si fom kaisa Koarl VI. mea untastizzung dahofft hod. Da kaisa is owa no im söm joa gschduam und da einst berimte Vivaldi is in Wean unbeochted bliem. Im foigendn joa is da Vivaldi oba r a gschduam. A gedenkdofe aum Koarlsblozz (do, wo r a begrom wuan is) und de Vivaldigossn in favoritn (10. hieb) eainnan aun sei weana zeid.