Der Artikl is im Dialekt Stod-Soizburgarisch gschriem worn. |
A Politische Partei is a Gruppm vo Leid, de wos gleiche oda ähnliche politische Züle hom oda a gemeinsome Wöidaunschaung. S'Züi vo ana Partei is, daß s'politische Entscheidungen bestimmt oda zumindestns beeinflusst; zu dem Zweck vasuachts, daß s'bei Woin möglichst vüi Stimmen griagt, damid s'donn wichtige politische Ämta besetzn kau.
Politische Partein ghern zu de Eirichtungen im politischn System, de wos zwischn am Stood und de Bürga vamittln. Af da an Seitn san s'dazua do, daß de Leid im Parlament und in da Regierung bessa kontrollierd wern: Wonn jetz ana ned de Politik mocht, de wos de Partei vor da Woi vasprochn hod, kau eam d'Partei nächsts Moi nimma afstöin. Und wonn de gonze Partei nimma des mocht, wos s'vasprochn hod, kau da Bürga nächsts Moi a ondane Partei wöin.
Af da ondan Seitn hom s'owa a a umkehrde Funkzion: Partein sorng nämli durch eanane Vaonstoitungen und Werbung dafir, daß de Politik, de wos s'in eanane gwöidn Ämta mochn, bei de Parteimitgliada und drüwa hinaus a bei de ondan Leid akzeptierd wead. Wonn jetz de Parteimitgliada oda d'Leid insgesomt woin, daß a bestimmtes Problem in da Politik behondlt wead, kinnan s'des Intaresse afgreifn und eana Politik drauf ostimma. Im Gengsotz zu Intaressnsvadretungen miaßn Partein dabei schaun, daß s'möglichst vüi Leid mid eanane Inhoite ausprechn.
© MMXXIII Rich X Search. We shall prevail. All rights reserved. Rich X Search