Richard Wagner

Richard Wagner (* 22. Mai 1813 z Leipzig; † 13. Feba 1883 z Venedig im Palazzo Vendramin-Calergi) wor a deitscha Komponist vo klassischer Musi, Dramatiker, Schriftstella, Theataregisseur und Dirigent. Mit seine Musikdramen guit ea ois oana vo de bedeitenstn Erneiara vo da eiropäischn Musi vom 19. Joahundat. Ea hod Opern ois Gsamtkunstweak gstoitet und Text, Musi und Regieoweisunga dazua gschriem. Ois easchta Komponist hoda Festspui grindd, de Bareida Festspui und des Festspuihaus dazuaplant. Seine Neiarunga in Harmonik hom bis zum heitign Dog an Einfluss auf de Entwicklung vo da klassischn Musi.

Da Wagner hod se de Afgob gstejt, des - seina Moanung noch - „dekadente” Theata z reformian und mit Huif vo da Kunst de Voikseaziahung und damit de Wejd z vabessan. Sei Idee wors Musi und Drama z vaknipfn (Das Kunstwerk der Zukunft, Oper und Drama) und in Olehnung an de Tradition vo da griachischn Tragedie a neie Kunstrichtung z begrindn. In seine Schriftn hod a imma wieda driwa gschriem, wia mit Huif vo da Musi a dramatische Handlung zu oana „Botschaft” wean ko und wia de Musi (des weibliche, gebärende Element) da Dichtung (am mennlich, zeigendn Samen) meara Ausdruckskraft gibt.