C'l artìcul chè 'l è scrit in Miranduléś |
La Doris Mary Anne Kappelhoff, cgnusùda méj cuma Doris Day (Cincinnati, 3 'd Avrìl dal 1922 - Carmel, 13 ad Maǵ dal 2019), l'è stada na cantànta e atōra americàna, famóśa anc p'r al sò scutmàj ad Muróśa dl'Amèrica. Spuśàda quàtar vòlti e c'n un fiōl ciamâ Terry Melcher ch'l è andâ in a risć 'd èsar cupâ par Charles Manson insém a la Sharon Tate, in dal 2004 l'à ciapâ la Mdaja Presidensiàla dla Libertà da 'l presidènt George W. Bush.
L'à catâ 'l sucès radiufònig e discugràfic in di an Quarànta cuma cantànta jazz, muciànd sù da piò ad 650 canti, e pò anc cuma atōra in di an Ssanta laurànd in 39 film cun di regìsta cuma Alfred Hitchcock (in L'uomo che sapeva troppo) e David Miller (Merletto di mezzanotte) e atōr cuma Rock Hudson, John Gavin, Cary Grant e Jack Lemmon.
In séguit, da 'l 1968 a 'l 1973, l'à tòlt part a la sitcom a sò nóm The Doris Day Show faghénd 128 epiśòdi par pò ritiràr-as da 'l mónd dal spetàcul par dar vita a n'asuciasiòṅ da la banda dal bèsti, la Doris Day Animal League. Candidàda a 'l Prèmi Òscar par la pelìcula Il letto racconta, in dal 2008 l'à vins un Grammy Award a la caréra. L'è mòrta 'd palmunît in dla sò cà in Califòrgna ch'la gh'iva nuànta-sèt an.
© MMXXIII Rich X Search. We shall prevail. All rights reserved. Rich X Search