C'l artìcul chè 'l è scrit in Miranduléś |
I The Bates i èṅ un grup muśicàl punk tedésc fundâ a Eschwege in dl'Àsia in dal 1987. Al nóm dal grup al daśvîṅ da 'l persunàǵ ad Norman Bates dal film Psyco 'd Alfred Hitchcock.
Al grup 'l è cgnusû prinsipalmènt par via dal sò cover ad braṅ di àt'r artìsta, difàti su tut i sò disc a gh 'n è almànc dū a la vòlta insém a 'l cansòṅ scrìti da lōr.
I The Bates i s fànan cgnósar in dal 1995 quand i faṅ vgnir fóra la cover ad Michael Jackson Billie Jean sunàda a la manéra hard rock, un braṅ ch'al riva diretamènt a 'l 10im pòst dal clasìfichi śvisri e a 'l 67śum pòst ad qvéli ingléśi. Al sìngul al s cata in dal disc Pleasure + Pain (Piaśér + Dulór).
I àtar braṅ più famóś dal grup tedésc i èṅ la cover di Shakespears Sister Hello (Turn Your Radio On) dal 1994, A Real Cool Time dal 1995, It's Getting Dark dal 1996 e Independent Love Song dal 1997.
In dal 2000 i rigìstr'n un disc ad cover, 2nd Skin (Secónda pèl) cun dèntar, fra i àtar, Helter Skelter di The Beatles, Out of Time di Rolling Stones e Blue di Eiffel 65, ma 'l è 'n fōg ad paja parchè dòp al grup al s disfa.
In dal 2006 a mōr al cantànt Markus Zimmer dit “Zimbl” e i The Bates i s mét'n incóra insém p'r arcurdàr-al in un cuncèrt in dal Dicémbar dal stés an, vgnû fóra pò in un vìddeo ciamâ Zimbl - A real cool time.
© MMXXIII Rich X Search. We shall prevail. All rights reserved. Rich X Search