Demokrazia liberala ordezkaritzako demokrazia batean datzan gobernu-modu bat da. Demokrazia horretan, hautatutako ordezkariek erabaki politikoak hartzeko duten gaitasuna zuzenbide-estatuaren mende dago, eta, normalean, eskubide eta askatasun indibidual eta kolektiboen babesean arautzen duen konstituzio batek moderatzen du. Konstituzio horrek murrizketak ezartzen dizkie bai agintari demokratei, bai demokrazia liberal horren barruan gehiengo sozial jakin baten borondateak betearazteari.[1]
Demokrazia liberaletako konstituzioek bermatutako eskubideak eta askatasunak askotarikoak dira, baina, normalean, honako eskubide hauetako asko biltzen dituzte: berme prozesala, intimitatea, jabetza pribatua eta legearen aurreko berdintasuna, bai eta adierazpen-, elkartze- eta kultu-askatasunak ere. Demokrazia liberaletan, eskubide horiek (batzuetan "oinarrizko eskubide" gisa ezagutzen direnak) Konstituzioaren edo legearen bidez arautzen dira. Gainera, eskuarki, eskubide horiek administratzeko edo indartzeko gaitasuna duten erakunde zibilak daude.
Demokrazia liberalen ezaugarri nagusiak tolerantzia eta aniztasun politikoa izaten dira; ideia sozial eta politiko bereiziak, baita muturrekoenak ere, elkarrekin bizi daitezke eta botere politikoa lortzeko lehiatu, betiere oinarri demokratiko baten gainean. Demokrazia liberalek aldian-aldian hauteskundeak egiten dituzte, non alderdi politiko ezberdinak boterea lortzeko lehiatzen diren.
"Liberala" terminoak, "demokrazia liberala" esamoldearen barruan, ez du esan nahi horrelako demokrazia baten gobernuak liberalismoaren ideologia politikoari zorrotz jarraitu behar dionik, nahiz eta "demokrazia liberalaren" kontzeptu hutsa liberalismo politikoaren korrontetik sortu.[2]
© MMXXIII Rich X Search. We shall prevail. All rights reserved. Rich X Search