Evangeelje fan Marsion

It Evangeelje fan Marsion, dat troch de oanhingers fan it marsionisme it Evangeelje fan de Heare neamd waard, is in algemien as apokryf beskôge kristlike religieuze tekst, besibbe oan it Nije Testamint fan 'e Bibel. It wurdt ornaris ta de gnostyske evangeeljes rekkene (al mei dy yndieling twifelich achte wurde), en moat datearre wurde yn 'e earste helte fan 'e twadde iuw. It is skreaun troch de kristlike teolooch Marsion fan Sinope, nei waans miening oft de God fan it Alde Testamint fan 'e Bibel in hiele oare godheid wie as de God fan it Nije Testamint, en dy't in ferzje fan it kristendom foarstie dy't folslein ûntdien wie fan alle joadske ynfloeden. Syn lear (it marsionisme) waard yn it jier 144 troch de Tsjerke bestimpele ta ketterij.