Insulae Pacificae

Insulae Pacificae sunt a 20 000 ad 30 000 insularum in Oceano Pacifico sitarum. Plurimae infra Tropicum Cancri patentes una appellantur Oceania,^[1] sed aliquando definitur Oceania ut Australasiam et Archipelagum Malaicum comprehendat. Hae insulae usitate in tres greges culturales digeruntur: Melanesia, Micronesia, Polynesia:

• Melanesia 'insulae atrae'. Inter has insulas, infra aequatorem patentis, sunt Nova Guinea (maxima insula Pacifica et secunda a maxima in tellure post Groenlandiam, quae in civitatem liberam Papuam Novan Guineam et provincias Indonesianas Maluku, Papuam, et Papuam Occidentalem dividuntur), Nova Caledonia, Zenadh Kes (Insulae Freti Torresiani), Vanuatu, Viti, et Insulae Salomonis.

• Micronesia 'insulae parvae'. Inter has insulas sunt Mariannae Septentrionales, Guama, Insula Wake, Palau, Insulae Marsalienses, Kiribati, Nauru, et Civitates Foederatae Micronesiae, sed aliquando Nauru et Banaba (in Kiribati) separatim perscribuntur. Plurimae supra aequatorem patent.

• Polynesia 'insulae multae'. Inter has insulas, plerumque infra aequatorem patentis, sunt Nova Zelandia, Insulae Havaianae, Rotuma, Atollum Medium, Insulae Samoanae (in Civitatem Liberam Samoam et Samoam Americanam divisae), Tonga, Tuvalu, Insulae Cook, Uvea et Futuna, Tokelau, Niue, Polynesia Francica, et Insula Paschalis. Polynesia geographice est maxima ex his regionibus.

Insulae Oceaniae praeterea digeri possunt in duos greges topologicos: insulas altas et insulas humiles. Montes igniferi insulas altas gignunt, quae plures homines plerumque sustinere possunt et fertiliorem solum habent. Insulae humiles sunt scopuli vel atolla, proprie minores et infertiliores. Melanesia, cui sunt plurimi homines trium regionum, multas insulas altas continet, cum plurimum Micronesiae et Polynesiae insulae humiles sint.

Insuper multae insulae intra fines Oceani Pacifici patentes partes Oceaniae non putantur. Inter has insulas sunt Insulae Galapagenses Aequatoriae; Insulae Aleutiae in Alasca Civitatum Foederatarum; Insula Vancuverium Canadae; Sachalina et Insulae Curilenses, insulae Russicae; Taivania et aliae insulae Reipublicae Sinarum pertinentes; Philippinae; insulae in Mari Sinensi Australi patentes, inter quas disputatae Insulae Maris Sinensis Australis; plurimae insulae Indonesiae; et Iaponia, civitas insularis, quae Archipelagum Iaponiensem amplectitur.