Margarita Chan

Margarita Chan, nomine pleno Margaret Chan Fung Fu-chun sive Sinice 陳馮富珍 (Hongcongi die 21 Augusti 1947 nata) est publicae salutis erudita et politica internationalis.

Alumna est universitatis Ontarionis Occidentalis et universitatis nationalis Singapuranae. In urbe natali operam dedit ab anno 1978 apud ministerium valetudinis, ubi a mense Iunio 1994 usque in Augustum 2003 directrix meruit, prima feminarum. Inde ad Ordinem mundi sanitarium progressa est. Huius ordinis rectrix (director general) die 4 Ianuarii 2007 facta est, suadente inter alios praeside Sinarum Hu Jintao.