Maria Teresa Pinna Catte (... – 05 austu 2022) est istada una sotziolinguista, maista, iscritora e ativista pro is deretos umanos sarda.
At traballadu comente dotzente de inglesu in s'Istitutu Tècnicu de Nùgoro. In s'ìnteri de s'esperièntzia de traballu sua, at iscobertu s'importu chi sa lìngua sarda tenet pro is istudiantes comente lìngua mama. Custa iscoberta dd'at fata essire una sustentadora cumbinta de sa netzessidade de s'imparu de su sardu a is pipios in s'iscola. Pro portare a in antis custu intentu at conduidu progetos medas.[1][2][3]
Dae s'esperièntzia de imparu de su sardu a is pipios, impreende a fitianu su pròpiu mètodu de immersione de is limbas istrangias[1], e a pustis de tres annos de traballu, in su 2003 est nàschidu unu libru illustradu de impreare comente aina didàtica, Su sardu jocande, imprentadu dae Condaghes e iscritu in s'incumentzu in sa variedade nugoresa e a pustis fintzas in campidanesu e logudoresu. Su libru est pensadu fintzas pro preparare is istudiantes a una variedade unificada/mesana de su sardu pro s'impreu giurìdicu-amministrativu, de acostare a sa faeddada e a sa grafia locale[4].
A custa variedade at contribuidu issa etotu, pighende parte a sa cummissione chi at formuladu sa proposta de sa Limba Sarda Comuna de su 2006.[5]
De ideales sotzialistas, s'est impinnada pro s'amparu de is deretos umanos e in favore de caminos de inserimentu sotziale nou pro is cundennados a presone[2].
Est istada cojuada cun Peppino Catte (1916 - 1975[6]), abogadu, cussigeri regionale, assessore e responsàbile, in pari cun àteros, de sa riforma agrària.[2]
© MMXXIII Rich X Search. We shall prevail. All rights reserved. Rich X Search