Alawiten

D Alawite (علويون‎ / ʿAlawīyūn, au Nusairier, arabisch نصيريون‎, DMG Nuṣairiyūn) si e Däil vo dr schiitische Gmäinschaft im Nooche Oste. Si si was vo de irakische Ghulū no übrig bliibe isch. D Alawite lääbe hauptsächlig z Sürie, in dr Türkei und im Libanon. D Alawite si nid immer und nid vo alle Muslime as Muslim anerkennt worde.

Under em sürische Bresidänt Hafiz el Assad und sim Soon Baschar nämme d Alawite z Sürie e Machtposizion ii, wo sit em Ufstand vom «Arabische Früelig» in Gfoor isch. Es het Übergriff vo de Ufständische gege Alawite gee, und vili Alawite häi Angst, ass es Verfolgige wurd gee, wenn d Revoluzioon wurd groote.