Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
't Aovendmaol is in de protestantse kèrke 't ritueel (sacremint) wat 't Lèste Aovendmaol vaan Zjezus mèt de Apostele in d'n Hoof vaan Gethsemane herdink. 't Is, mèt aander wäörd, d'n tegehenger vaan de kathelieke communie. Bij protestantse kèrke is 't ein vaan de mer twie sacreminte; 't aandert is d'n duip.
Bij 't aovendmaol geit 't gans aanders es bij de communie. Um te beginne geluive de protestante neet in de transsubstantiatie ('t katheliek dogma wat beweert tot bij dit sacremint de hostie wèrkelek in 't lief vaan Christus verandert); lutheraone hantere in plaots daovaan de consubstantiatie ('t broed blijf broed, meh vervölt tegeliek ouch zien functie vaan lief vaan Christus), calviniste zien 't es zuver symbolisch (Zjezus heet die oetspraok neet lètterlek gemeind). Wijer steit, dewijl bij de kathelieke de mès um de communie drejt, 't protestants aovendmaol neet centraol in d'n deens; 't veurnaomste is de preek.
Bij bevindelek gerifformeerde kèrkgenoetsjappe mage allein de 'kinder vaan God' (de geluivege die de 'bevinding' höbbe oondergaange) aon 't aovendmaol mètdoen en mote de aander leie vaan de gemeinte touwzien. Aander genoetsjappe höbbe dat versjèl neet.
© MMXXIII Rich X Search. We shall prevail. All rights reserved. Rich X Search