Banyamulenge

Banyamulenge izenaz ezagutzen da Kongoko Errepublika Demokratikoan bizi den Ruandako jatorriko jendea, banyaruanda edo banyarwanda izen kolektiboan bildua, eta kinyaruanda hizkuntza hitz egiten duena. Batez ere Ipar Kivu eta Hego Kivu ekialdeko probintzietan bizi dira komunitate handienak, eta tokian tokiko izen bereziak hartzen dituzte. Banyamulenge izena dator, berez, Hego Kivuko Mulenge meseta altuan bizi direnen aldetik. Banyamasisiak, berriz, Ipar Kivuko Masisi eskualdekoak dira; edo banyavyurak, Katanga probintziako Ipar-Ekialdeko Vyura eskualdekoak.