Eivissa

Eivissa (Ibiza en castellán) ye una islla del mar Mediterraneu que forma, xunto cola de Formentera, l'archipiélagu de les Islles Pitiuses. Esti, magar que ye un archipiélagu diferente al formáu poles islles de Mallorca, Menorca y Cabrera, agrúpase alministrativamente con elles pa formar la Comunidá Autónoma de les Islles Baleares, n'España. Tien una estensión de 570 km² y una población (INE, 2008) de 125.053 habitantes. Mide 41 km de norte a sur y 15 km d'este a oeste, y tien 210 km de contornu. La so xeografía ye irregular, rescamplando n'altor, ente los montes que tien, Sa Talaia (475 m). Alcuéntrase nella, amás, el que yera l'únicu ríu de les Baleares, el de Santa Eulària des Riu, que lleva bien d'años ensuchu pola esplotación escesiva de los acuíferos soterraños que lu alimentaben. Les principales poblaciones son Eivissa (48.684 habitantes en 2009), capital y sé del Consell Insular d'Eivissa i Formentera(institución de gobiernu de la islla), Santa Eulària des Riu y Sant Antoni de Portmany. La islla ye perfamosa poles sos clubs y discoteques (Space, Pacha, Privilege Ibiza, Amnesia, DC10, El Divino, Café del Mar, Es Paradis...), que se convierten tolos branos en llugar d'alcuentru de turistes de tou el mundu.