Fehde

Mit Feede bezäichnet mä e rächtligi Iirichdig, wo vom Middelalter bis zur Früeje Nöizit d Regulierig vo Rächtsbrüch diräkt zwüschen däm, wo dr Schaade erlitte het, und däm, wo dr Schaade verursacht het, greeglet und drbii jedi übergordneti Instanz usgschaltet het. Feedefähig si nume Freiji gsi, was e Chnächt gmacht het, isch sim Heer aagrächnet worde.

D Feede wird hützudaag vilmol mit Bluetrach oder Vendetta gliichgsetzt, was ungnau isch. D Bluetfeede isch d Ultima Ratio bin ere Komfliktbewältigung innerhalb vo dr Feede gsi, wenn Süüne und Schaadensusgliich nit aawändbar gsi oder vo äinere vo de Parteije abgleent worden si.

D Feede isch us unserem hütige Rächtsempfinde uuse nüm akzeptiert, wil in modärne Gsellschafte, wo dr Staat e Gewaltmonopol het und d Beziejige zwüsche iim und de Bürger bzw. d Beziejige vo de Bürger underenander rächtsstaatlig greeglet isch und alli Sälbstjustiz (im Allgemäine) abgleent wird.