Gladiatour

micher istorel
Iskevrennad eus	stourmer
Stad	Henroma
Tachenn vicherel	emgann gladiatour
Deskrivet dre	Colossal statue of a gladiator, Gladiators on ancient Roman oil lamps, Relief of gladiators
Stumm benel an dikedenn	gladiatorka, gladiatourez

Ur gladiatour (latin : gladiator, "klezeour" diwar al latin gladius, "kleze") a oa ur stourmer armet evit reiñ dudi da arvesterien en amzer Roma gozh (Republik hag Impalaeriezh Roman). Ar stourmoù a-enep gladiatourien all, loened gouez ha torfedourien kondaonet a c'helle bezañ kalet betek ar marv. Lod gladiatourien a oa a-youl-vat evit klask rastellañ arc'hant, tapout brud hag ur renk sokial uheloc'h. An darn vrasañ avat a oa sklaved, gourdonet-garv, ha lakaet a-gostez diouzh ar peurrest eus ar gevredigezh zoken goude o marv.

Ne ra forzh o orin, ar c'hladiatourien a oa graet evit dudiañ hag evit bezañ skouerioù eus kenedouriezh Roma a-fed stourm, ha gant o emgannoù betek ar marv e c'hallent bezañ azeulet gant ar bobl. Alies int bet meulet en arzoù, ha pouezus e oant a-fed dudi rak kavout a reer e-leizh a skeudennoù anezho dre ar bed roman a-bezh.

Orin ar stourmoù gladiatourien n'eo ket sklaer c'hoazh, ha tabut zo etre an istorourien. Prouennoù zo e oa anezho e-pad lidoù-kañv e-kerzh ar Brezelioù punek en III^e kantved kt JK, ha goude-se e oa bet ar stourmoù-se o tont da vezañ buan un diazez er politikerezh ha buhez sokial ar bed roman. Gant ma oa brud an emgannoù gladiatourien o vont war-raok e oa bet implijet muioc'h-mui a arc'hant hag a zafar evit ober anezho gouelioù pe lidoù ramzel deuet da vezañ ludi, "c'hoarioù".

Tost da 1 000 bloaz e oa padet an emgannoù gladiatourien ; en o barr e oant bet etre ar I^añ kantved kt JK hag an II^vet kantved.

Ul lodenn eus Mozaikenn Zliten e Leptis Magna e Libia, e-tro an IIvet kantved goude JK.
A gleiz da zehou : un thraex o stourm a-enep ur murmillo, un hoplomachus war-sav gant ur murmillo all (o tiskouez eo trec'het)