Heiliger

As Häilige wird e Mensch bezäichnet, wo mä von em dänggt, ass er ere Gotthäit bsundrigs nooch stieng oder in religiööser und eethischer Hiisicht vorbildlig sig. Anerkennt wärde Häiligi antwääder vo religiööse oder bolitische Autoridääte oder aber vom glöibige Volk, wo sä vereert; e wichdigi Rolle chönne Fenomeen spiile, wo mit em Häilige zsämmehange und as übernatüürlig interpretiert wärde (Wunder). Die kultischi Vereerig vo Häilige bezäichnet mä as Häiligevereerig.