Kondom

E Kondom isch e chliins länglichs Latex-Gummitäschli, wo brucht wird zum Schwangerschafte z verhüete und vor Gschlächtschrankheite z schütze. Es wird über dr erigierti Penis gstreift und lit äng a dr männliche Ruete a und het vorne am Spitz bi der Eichle e Reservoir, wo de männlichi Same uffanget und so am Uslaufe hindere.

D Effektivität vom Kondom hängt stark drvo ab, wie men s brucht. Wenn mä dr Kondom perfekt awändet, cha mä uf e Pearl-Index vo 0,6 cho, was bedütet, ass 0,6 Prozänt vo de Fraue, wo e Joor lang verhüete, schwanger wärde. Typisch isch aber e Pearl-Index zwüsche 2 und 15, das heisst 2 bis 15 Schwangerschafte uf hundert Fraue im Joor. Nebscht dem, isch es Kondom e 99%ige Schutz vor sexuellübertragbare Chrankheite wie d HI-Vire (AIDS), sowie d Vire vo Hepatitis A/B/C und vor Chrankheite, wo vo Bakterie usglöst wärde wie Syphilis oder Gonorrhoe oder pilzbedingt si wie Candidiasis.