Laskariden

As Laskaride wird d Dünastii vo de byzantinische Kaiser bezäichnet, wo us dr Familie Laskaris (Λάσκαρις) gstammt si und zwüsche 1204 und 1258 z Nikaia residiert häi.

Wo d Chrüzfaarer im Joor 1204 Konstantinopel erooberet, s Latiinische Kaiserriich errichdet und dr byzantinisch Kaiser us sinere Hauptstadt verdriibe häi, isch s em Theodor I. Laskaris, em Schwiigersoon vom früenere Kaiser Alexios III., glunge, si Herrschaft z Nikaia z etabliere. Si Noochfolger isch si Schwiigersoon, dr Johannes III. Dukas Batatzes gsi, und däm si Soon Theodor II. het wider dr Naame Laskaris aagnoo. Im Theodor si ummündige Soon Johannes IV. Laskaris isch noch drei Joor vo sim Regänt Michael VIII. us dr Familie Palaiologos abgsetzt worde.