Lijsttrekker

 E articulo aki ta uza ortografia di Papiamento. Lo aprecia si por mantene e articulo aki na estilo di Papiamento.

lijsttrekker

Supkategoria di	politiko, candidate
Faseta di	election campaign, representative democracy

Lijsttrekker (literalmente: "esun cu ta ranca e lista"; na ingles: lead candidate; aleman: spitzenkandidat) ta e termino pa un candidato cu ta encabesá e lista di un partido politico durante un campaña of proceso electoral. E termino "lijsttrekker" ta di origen Hulandes y ta wordo utilisa na Hulanda, Belgica, Surinam^[1] y tambe den Caribe Hulandes. ​

Den paisnan cu ta uza listanan di candidato pa eleccion parlamentario na nivel nacional e figura di "lijsttrekker" casi semper ta e lider politico di un partido. Despues di un eleccion e persona aki generalmente ta lidera su fraccion den parlamento of sea ta ocupa un puesto importante den e gabinete nobo, si acaso e partido di e lijsttrekker bay den gobierno (via coalicion of mayoria absoluto). Na Hulanda, e prome minister casi semper ta bin for di seno di e lijsttrekkernan di e eleccion anterior.^[2][3]

Na Belgica, e eleccion nacional ta solamente a base di listanan provincial, loke tin como consecuencia cu por tin hasta seis lijsttrekker pa cada partido, di cua generalmente un di nan ta e lider di partido. Aki tambe ta uza e termino lijsttrekker pa eleccionnan municipal.

Durante e campaña electoral, e lijsttrekker ta atrae mas tanto atencion, por ehempel durante debatenan caminda e lijsttrekkernan ta debati cu otro na television riba temanan importante.^[4] Pues un lijsttrekker ta e candidato principal di un partido politico pa un eleccion, aunke den practica esey no ta semper e caso na Caribe Hulandes (Aruba: AVP/eleccion 2024; Corsou: MKP/eleccion 2025).

Comunmente e lijsttrekker ta renuncia su cargo of ta bandona politica por completo si su partido sali perdedo den un eleccion. Frecuentemente, partidonan tambe ta pone un político conoci of un celebridad riba e ultimo posicion di e lista di candidato; esaki ta yama lijstduwer (literalmente "pushado di lista").