Normannen

As Normanne bezäichnet mä zwäi Gmäinschafte, wo us verschiidene Regioone chömme: Uf dr äinte Site handlet es sich um Nordgermane, d. h. d Iiwooner vo Skandinavie und Island, wo germanischi Sprooche gschwätzt häi und wo zwüschen em spoote 8. und em 11. Joorhundert Raubzüüg in Richdig Süüde (Ängland, Irland, s Frankeriich, Middelmeerruum und s hütige Russland) gmacht häi, uf dr andere Site bezäichnet mä eso die romanisierte Normanne, wo sich vom 9. Joorhundert aa vo dr Normandii us usbräitet häi. D Normanne si käi genau definierti Volksgrubbe gsi. Es het sich bin ene um Grubbe ghandlet, wo zum Däil kulturell, ethnisch und sproochli verschiide gsi si (Dääne, Schweede, Norwääger, Isländer, Iiwooner vo dr Normandii sit em früeje 10. Joorhundert), wo vilmol au geegenenander kämpft häi.