Paleoamericanu

El Paleoamericanu o Paleoindiu ye la era inicial y la más llarga de la historia americana (Entiende tolos sucesos asocedíos aproximao antes del 8000 e. C.). Mientres esi tiempu desenvolviéronse les primeres ferramientes de piedra y les bases de la diversidá étnica y llingüística d'América precolombina. Por estensión, aplícase tamién el términu pa designar a los seres humanos que vivieron nel continente mientres esa fase.

L'entamu d'esta gran fase histórica ye motivu de bancia ente los especialistes. Magar toos tán d'alcuerdu en qu'empecipia cola primer presencia humana n'América, nun hai consensu sobre'l momentu en qu'esto asocedió y les rutes migratories que siguieron esos grupos. Por munches décades, la propuesta dominante foi la llamada teoría del poblamientu tardíu, pa la que los primeros humanos nun pudieron haber llegáu antes del 11 000 e. C. por cuenta de condiciones climatolóxiques y a que nun hai evidencia arqueolóxica válida que sofite una fecha anterior.

Dellos descubrimientos posteriores a los años sesenta punxeron en tela de xuiciu la validez d'esta propuesta. Dellos sitios allugaos nel centru y sur del continente refundiaron feches por radiocarbono más antigües que les ufiertaes polos partidarios de la teoría del poblamientu tardíu ―tamién llamada «clovis primero»―, lo que dio pauta al fortalecimientu de la teoría del poblamientu tempranu. Munchos d'estos afayos fueron oxetaos por inconsistentes, xeneralmente col argumentu d'una contaminación del xacimientu por factores non humanos. Sicasí, la solidez de la evidencia topada en Monte Verde (Chile) nun dexa llugar a dulda, y les sos feches por radiocarbono (12 800 e. C.) son anteriores a les de cualesquier otru xacimientu norteamericanu llibre d'oxeción.

Los datos disponibles pa la historia d'esti periodu son escasos, particularmente nes dómina más antigües, y xeneralmente trátase de inferencias a partir de los afayos arqueolóxicos, que consisten principalmente en ferramientes de piedra y restos orgánicos ―humanos, animales y vexetales― o d'antiguos campamentos. A partir d'ellos repara una complexidá creciente y una esploración teunolóxica que dio como resultáu una mayor diversidá de materiales pa la confección de ferramientes y l'especialización d'estes para diverses actividaes.