Pristina

Prischtina ( [pɾiʃtiːna]; albanisch Prishtina oder Prishtinë; serbisch Приштина/Priština; dytsch Pristina, veraltet au Prischtina) isch d Hauptstadt vum Kosovo un mit rund 145.000 Yywohner (Stand 2011) au di grescht Stadt vum Land. In dr Stadt sin dr Sitz vu dr Regierig, dr Barlemantssitz un dr Amtssitz vum Bresidänt. Derzue het s do d Hauptquartier vu dr UNMIK-, dr OSZE- un dr EULEX-Missione im Land. Im Mittelpunkt vum Amselfäld gläge, isch Prischtina au Verchehrschnotepunkt un wirtschaftli un kulturäll Zäntrum vu dr Republik Kosovo. Zue dr Gmai Prischtina (albanisch Komuna e Prishtinës, serbisch Општина Приштина/Opština Priština), wu rund 200.000 Yywohner zellt, ghere näb em Stadtbiet no 41 Ortschafte drum ume. Prischtina isch derzue au Hauptstadt vum glychnamige Bezirk. Rund 98 % vu dr Yywohner sin ethnischi Albaner.