Tannaiten

As Tannaim (Tannaite, aramäisch: Tanna = Leerer; aramäisch tanna vo hebräisch schana, widerhoole, leere)^[1] wärde d Mäister/Rabbine vo de jüüdische Leere bezäichnet, wo spööter as autoritativ aagluegt und mündlig dur ständigi Widerhoolig witer gee worde si bis dr Jehuda ha-Nasi si am Aafang vom dritte Joorhundert gsammlet und ufgschriibe het.^[2] D Tannaite si die Gsetzleerer, wo d Leere von ene dr Inhalt vo dr Mischna bilde, also d Leerer vo dr mischnaische Zit.

Es het mee as 250 Tannaite gee und si häi fast alli in Palestina gläbt und gleert, die erste in de Schuele vom Hillel und Schammai^[1], die letschte bim Juda ha-Nassi.

Zu iire Wärk ghööre d Mischna (d Hauptsammlig), d Tossefta (Ergänzige zur Mischna), d Baraita (tannaitischi Fragmänt im Talmud) und halachischi Midraschim (Usleegige noch dr Halacha).

1. ↑ ^{1,0 1,1} Adin Steinsaltz: Talmud für jedermann, Verlag Morascha, 2. Uflaag, Baasel, 1998, S. 38
2. ↑ Dr Ardikel «Mishnah» in dr Encyclopaedia JudaicaBand 14, S. 319, 2. Usgoob 2007, isbn 978-0-02-865942-8 . Dr Heinrich Graetz hingeege dänggt ass d Mischna im Joor 189 n. d. Z. verfasst worde sig (lueg: H. Graetz, History of the Jews, vol. 6, Philadelphia 1898, p. 105).