10 results found for: “BTS”.

Main result

BTS

An BTS (Koreano: 방탄소년단; RR: Bangtan Sonyeondan), na bistado man bilang Bangtan Boys, iyo sarong Sur na Koreano na boy band na namokna kan 2010 asin nagdebyu kan 2013 sa irarom kan Big Hit Entertainment. Pigbibilog nin pitong miyembro an grupo na iyo sinda RM, Jin, Suga, J-Hope, Jimin, V, asin Jungkook — na nagsusurat asin nagmomokna kan kadaklan kan saindang sadiring mga kanta. Orihinal bilang sarong hip hop group, an saindang estilo sa musika nagbago pasiring sa mahiwas na rango nin mga genre. An saindang liriko harus an pokus sa mga personal asin sosyal na komentaryo, tikwil sa tema nin salud sa pag-iisip, karibukan sa pagigin joven, kawaran, pagpasiring sa pagpadangat sa sadiri, asin indibidwalismo. An saindang kagibuhan may referensya sa literatura asin pisiyolohikal na konsepto asin kaiba an istoryang manungod sa alternatibong kahiwasan. An grupo nakapagluwas nin nagkapirang album asin nagka-igwa na nin nagkapirang internasyunal na konsyerto. Pagkatapos magdebyu kan 2013 sa saindang solong album na 2 Cool 4 Skool, an BTS nagluwas kan saindang Koreano na studio album na Dark & Wild, asin Hapones na studio album na Wake Up kan 2014. An saindang ikaduwang Koreano na studio album na Wings (2016) iyo an enot ninda na nakabenta nin sarong milyon na kopya sa Sur na Korea. Kan 2017, nagpasiring an BTS sa global music market, kun sain pinangenotan ninda an Korean Wave sa Estados Unidos asin nagbari nin nagkapirang mga record sa komersyo. Sinda an pinaka-enot na Koreano na grupo makaresibe nin sertipikasyon gikan sa Recording Industry Association of America (RIAA) para sa saindang solo na "Mic Drop", pati naman an enot na Koreanong akto na nangenot sa US Billboard 200 na tsart sa saindang studio album na Love Yourself: Tear (2018). BTS man an pinakmarikas na grupo pagkatapos kan The Beatles na makaguno nin apat na numero uno na album sa US, na nagibo ninda sa laog nin hababa sa duwang taon. An Love Yourself: Answer (2018) an enot na Koreanong album na sertipikadong platinum kan RIAA. Kan 2020, BTS an nagin pinaka-enot na all-South Korean act na nakaabot nin numero uno sa Billboard Global 200 asin US Billboard Hot 100 para sa saindang solong "Dynamite" asin remix kan "Savage Love (Laxed – Siren Beat)". Sa pagbenta ninda nin 20 milyong album sa Gaon Music Chart, BTS an best-selling artist sa historya kan Sur na Korea asin pigkakapotan an "best-selling album" sa Sur na Korea na Map of the Soul: 7. An BTS may rangong numero 45 sa Billboard Top Touring Artists of the 2010s, an kasaro-sarong dae nagtataram nin Ingles na akto sa listahan. Kan saindang Love Yourself World Tour, BTS an nagin pinaka-enot na Asyano asin dae nagtataram nin Ingles na akto na magin headline asin ma-sell out an Wembley Stadium asin ganahon an record sa solong highest-grossing engagement sa historya nin Rose Bowl Stadium. Naitampok sa international cover kan Time bilang "Next Generation Leaders", an BTS nagluwas man sa listahan kan magasin bilang saro sa 25 most influential people sa internet (2017–2019) asin 100 most influential people in the world (2019), kun sain pigbansagan sindang "Princes of Pop". An Forbes Korea pigpangaranan an BTS bilang pinakaimpluwensyal na selebridad sa Korea kan 2018 asin 2020, asin an BTS nasa ika-43 sa Forbes Celebrity 100 (2019) bilang saro sa world's top-earning celebrities. Nasambit na kan 2019, an BTS may ambag nin mas dakula pa sa $4.65 billion para sa ekonomiya kan Sur na Korea kada taon, o 0.3 porsyento nin GDP kan nasyun. An saro sa kada 13 dayuhang turista sa Sur Korea pigsasabing uli sa kasikatan ninda, asin pigsasabing saro sa mga importanteng akto na nagpatalubo kan global music sales sa $19 bilyon kan 2018. Pagkatapos kan saindang Love Myself anti-violence na kampanya sa pakikipagtabangan ninda sa UNICEF, an BTS nagtaram sa ika-73 asin ika-75 na United Nation General Assembly asin nagin pinakajoven na resipyente kan Order of Cultural Merit hale sa Presidente kan Sur nah Korea uli sa saindang kontribusyon sa pagpapalaganap kan kultura asin tataramong Koreano.