10 results found for: “NATO”.

Main result

NATO

D NATO (ängl. North Atlantic Treaty Organization „Organisazioon vom Nordatlantikverdraag“ bzw. Nordatlantikpakt-Organisazioon; uf Dütsch hüfig s Atlantische Bündnis) oder OTAN (frz. Organisation du traité de l’Atlantique nord) isch en Internazionali Organisazioon, wo dr Nordatlantikverdraag, e milidäärischs Bündnis vo 28 öiropäische und nordamerikanische Staate, umsetzt. Im NATO-Hauptkwardier isch dr Nordatlantikroot dehäi, s Hauptorgan vo dr NATO; wo sit 1967 iire Sitz z Brüssel het. Wo dr Nordatlantikpakt am 4. April 1949 – zerst emol für 20 Joor – underschriibe worde isch, isch s Hauptkwardier bis zum April 1952 z Washington, D.C. gsi, denn isch dr Sitz vom 16. April 1952 bis 1967 z Bariis gsi. Dr Brüsseler Verdraag, dr Vorgänger vo dr NATO, isch e Bündnis für wirtschaftligi, soziali und kulturelli Zämmenarbet und für die kollektivi Sälbstverdäidigung vo westöiropäische Staate gsi. Er isch gege Dütschland grichdet gsi, wil die andere Öiropäer Angst ghaa häi, ass Dütschland wider chönnt stark und gföörlig wärde. Wo mä denn aber d Sowjetunion und iiri ost- und middelöiropäische Satellitestaate as Bedroig het afo gsee, häi sich d Öiropäer mit de Amerikaner gegen e Kommunismus verbündet und d NATO gründet. Mit em Kollaps vom Kommunismus het d NATO iiri Hauptrolle verloore und het sich in nöije Schaublätz afo angaschiere wie 1998 uf em Balkan und sit 2001 in Afghanistan. Sit em Uffdräte vo Russland as imperialistischi Macht under em Putin und em Aagriff uff d Ukraine spilt d NATO wider e wichtigi Rolle i dr Verdäidiung vom demokratische Europa.