Wes-Indiese nasionale krieketspan

Wes-Indië

Kenteken van die Wes-Indiese nasionale krieketspan
Bynaam	Windies,[1] Men in Maroon[2]
Konferensie	Krieket Wes-Indië (KWI)
Personeel
Toetskaptein	vakant
EDI-kaptein	Shai Hope
T20I-kaptein	Shai Hope
Afrigter	Andre Coley (toets), Daren Sammy (EDI- en T20I-krieket)[3]
Geskiedenis
Toetsstatus verkry	1928
Internasionale Krieketraad (IKR)
IKR-status	Volle lid (1926)
IKR-streek	Amerikas
IKR-ranglys Tans[5] Beste rang tot dusver Toetsrang 8ste 1ste (1 Januarie 1964) EDI 10de 1ste (1 Junie 1981) T20I 5de 1ste (10 Januarie 2016)[4]
Toetswedstryde (Toetse)
Eerste toets	t Engeland op Lord’s, Londen; 23–26 Junie 1928
Laaste toets	t Pakistan op Multan-krieketstadion, Multan; 25–27 Januarie 2025
Toetse Gespeel Gewen/Verloor Algeheel[6] 584 185/216 (31,67%) (1 gelykop, 182 onbeslis) Vanjaar[7] 2 1/1 (0 gelykop, 0 onbeslis)
Wêreldtoets- kampioenskappe	3/3 (eerste in 2019–2021)
Beste uitslag	8ste plek (in 2019–2021, 2021–2023 en 2023–2025)
Internasionale eendagwedstryde (EDIs)
Eerste EDI	t Engeland op Headingley, Leeds; 5 September 1973
Laaste EDI	t Bangladesj op Warner Park-stadion, Basseterre; 12 Desember 2024
EDIs Gespeel Gewen/Verloor Algeheel[8] 882 426/415 (48,29%) (11 gelykop, 30 onbeslis) Vanjaar[9] 0 0/0 (0 gelykop, 0 onbeslis)
Krieketwêreldbeker-verskynings	12/13 (eerste in 1975)
Beste uitslag	Kampioen (in 1975 en 1979)
Wêreldbeker- kwalifiserings	2 (eerste in 2018)
Beste uitslag	Naaswenner (in 2018)
Kampioenetrofee-verskynings	7/9 (eerste in 1998)
Beste uitslag	Kampioen (in 2004)
Twintig20s (T20Is)
Eerste T20I	t Nieu-Seeland op Edenpark, Auckland; 16 Februarie 2006
Laaste T20I	t Bangladesj op Arnos Vale-stadion, Kingstown; 19 Desember 2024
T20Is Gespeel Gewen/Verloor Algeheel[10] 216 93/109 (43,05%) (3 gelykop, 11 onbeslis) Vanjaar[11] 0 0/0 (0 gelykop, 0 onbeslis)
T20I-wêreldbeker-verskynings	9/9 (eerste in 2007)
Beste uitslag	Kampioen (in 2012 en 2016)
Toetsklere EDI-klere T20I-klere

Die Wes-Indiese nasionale krieketspan (Engels: West Indies cricket team) is die nasionale krieketspan wat Wes-Indië in internasionale krieket verteenwoordig. Die span staan bekend as die Wes-Indiese Eilande of, in die omgangstaal, die Windies, met die bynaam Men in Maroon (“Manne in maroen”). Dit is ’n multinasionale krieketspan in ’n sportkonfederasie wat die onafhanklike lande Antigua en Barbuda, Barbados, Dominica, Grenada, Guyana, Jamaika, St. Kitts en Nevis, St. Lucia, St. Vincent en die Grenadine en Trinidad en Tobago, asook die oorsese gebiede Amerikaanse Maagde-eilande, Anguilla, Britse Maagde-eilande, Montserrat en Sint Maarten verteenwoordig. In die meeste van hierdie eilandstate is krieket die nasionale sport, hetsy de facto of de jure. Vervolgens gebruik die Wes-Indiese krieketspan nóg een van die lande se volksliedere, nóg een van hul vlae as ’n verteenwoordigende simbool; pleks daarvan gebruik die Wes-Indiese nasionale krieketspan sy eie vlag – dié van Krieket Wes-Indië – en lied. In internasionale krieket is daar net twee ander spanne wat meer as een krieketland verteenwoordig: Engeland (vir beide Engeland en Wallis) en Ierland (vir beide die Republiek Ierland en Noord-Ierland).

Krieket word in Wes-Indië deur Krieket Wes-Indië (CWI, van Engels: Cricket West Indies) geadministreer. Hulle is die enigste volle lid van die Internasionale Krieketraad (IKR) in die Amerikas en die vierde oudste nasionale span in toetskrieket. Tydens die 1928-seisoen het hulle hul toetsdebuut gemaak, toe Wes-Indië op Lord’s hul eerste toets teen Engeland gespeel het. Wes-Indië is tans (Februarie 2025) agtste op die IKR-toetsranglys, tiende op die eendagranglys en vierde op die Twintig20-wêreldranglys.^[12][13][14]

Vanaf die middel-1970’s tot die vroeë 1990’s was die Wes-Indiese span een van die sterkstes ter wêreld in beide toets- en EDI-krieket en later in die 2010’s in T20I-krieket. ’n Hele aantal voormalige spelers, beskou as van die beste in die wêreld, is afkomstig van die Wes-Indiese Eilande. 21 voormalige Wes-Indiese spelers is in die Internasionale Krieketraad se Heldesaal opgeneem.^[15]

Die Wes-Indiese Eilande kon die Krieketwêreldbekertoernooi twee keer wen (in 1975 en 1979, toe dit die Prudentialbeker was), die T20I-wêreldbeker twee keer (in 2012 en 2016), en beide die Kampioenetrofee (in 2004) en die o/19-krieketwêreldbeker (in 2016) eenkeer. Hulle was die eerste krieketspan om die krieketwêreldbekertoernooi twee keer te wen, maar hul rekord is later deur Australië se vyf wêreldbekeroorwinnings verbeter en deur Indië in 2011 geëwenaar. Wes-Indië is ook die eerste span wat twee agtereenvolgende wêreldbekertoernooie gewen het, dit is sedertdien oortref deur drie agtereenvolgende wêreldbekeroorwinnings deur Australië (in 1999, 2003 en 2007). Wes-Indië was die eerste span om in drie agtereenvolgende wêreldbekertoernooieindstryde te verskyn (in 1975, 1979 en 1983), sedertdien oortref deur vier agtereenvolgende wêreldbekertoernooieindstrydverskynings deur Australië (in 1996, 1999, 2003 en 2007). Die Wes-Indiese Eilande het die Krieketwêreldbeker 2007, die T20I-wêreldbeker 2010 en die o/19-krieketwêreldbeker 2022 gehuisves, asook saam met die Verenigde State die T20I-wêreldbeker 2024. In Junie 2019, gedurende die Krieketwêreldbeker 2019, het die Wes-Indiese Eilande in hul 800ste EDI-wedstryd gespeel.^[16] Nadat Wes-Indië tydens die Krieketwêreldbekerkwalifisering 2023 nie die eindstryd kon haal nie, was die Krieketwêreldbeker 2023 die eerste toernooi sonder ’n Wes-Indiese deelname.

1. ↑ (en) "West Indies Cricket team officially renamed to 'Windies'". Indian Express. 2 Junie 2017. Besoek op 14 Februarie 2025.
2. ↑ (en) "The Men in Maroon have arrived for Sandals West Indies tour of England". Krieket Wes-Indië. 9 Junie 2020. Besoek op 14 Februarie 2025.
3. ↑ (en) "Daren Sammy appointed West Indies white-ball coach; Andre Coley to take charge of Test team". ESPNcricinfo. Besoek op 14 Februarie 2025.
4. ↑ (en) "West Indies secure no 1 T20 rankings". Krieket Australië. 11 Januarie 2016. Besoek op 14 Februarie 2025.
5. ↑ (en) "ICC Rankings". Internasionale Krieketraad.
6. ↑ (en) "Test matches – Team records". ESPNcricinfo.
7. ↑ (en) "Test matches – 2025 Team records". ESPNcricinfo.
8. ↑ (en) "ODI matches – Team records". ESPNcricinfo.
9. ↑ (en) "ODI matches – 2025 Team records". ESPNcricinfo.
10. ↑ (en) "T20I matches – Team records". ESPNcricinfo.
11. ↑ (en) "T20I matches – 2025 Team records". ESPNcricinfo.
12. ↑ (en) "Men's Test Team Rankings". Internasionale Krieketraad. 10 Februarie 2025. Besoek op 14 Februarie 2025.
13. ↑ (en) "Men's ODI Team Rankings". Internasionale Krieketraad. 12 Februarie 2025. Besoek op 14 Februarie 2025.
14. ↑ (en) "Men's T20I Team Rankings". Internasionale Krieketraad. 28 Januarie 2025. Besoek op 14 Februarie 2025.
15. ↑ (en) "ICC Hall of Fame". Internasionale Krieketraad. Besoek op 14 Februarie 2025.
16. ↑ (en) "West Indies play 800th ODI in ICC Cricket World Cup clash against Australia in Trent Bridge". News Nation. 6 Junie 2019. Besoek op 14 Februarie 2025.