Athanasius Kircher

Dr Athanasius Kircher SJ (au: Athanasius Kircherus Fuldensis; * 2. Mai 1602 z Geisa (Rhön); † 27. Novämber 1680 z Rom) isch e dütsche Jesuit und Universalgleerte im 17. Joorhundert gsi. E groose Däil vo sim Lääbe het er am Collegium Romanum z Rom Underricht gee und gforscht. Dr Kircher het e Hufe usfüerligi Monografie über e wits Spektrum vo Theme uusegee, unter anderem in dr Egüptologii, dr Geologii, dr Medizin, dr Mathematik und dr Muusigtheorii. Si Arbet über die egüptische Hieroglüüfe het dr Wääg für e Jean-François Champollion vorberäitet.

Dr Friedrich Kittler het dr Kircher as «en Art wüsseschaftligi Füürweer vom Babst» bezäichnet: er sig immer ume Wääg gsi, wenn wüsseschaftligs Nöiland entdeggt worde isch, aber au, wenn mä s im Naame vo dr Chille het müesse verdäidige.^[1] Dr Kircher isch sinere Zit vorus gsi, daas cha mä gsee an sim Iifluss uf d Bakteriologii, Medizin, Akustik, Astronomii, Mechanik und Farbeleer. Er het as erste dr Iifluss vo „chliine Wääse“ uf d Verbräitig vo dr Pest bostuliert und het die erste Regle ufgstellt zum sä mit Erfolg z bekämpfe.

Im Kircher si Motto isch gsi In uno omnia (In Äim alles).

1. ↑ Friedrich Kittler (Hrsg.): Zwischen Rauschen und Offenbarung. Zur Kultur- und Mediengeschichte der Stimme. Akademie, Berlin 2002, ISBN 3-05-003571-4, S. 88.