Gemeindenummer

Dialäkt: Züritüütsch

D Gmeindsnummere (au Code-Nr., GEOSTAT-Nr. oder BFS-Nr. gnännt) isch e vom schwiizerische Bundesamt für Schtatistik mit em Amtliche Gmeindsverzeichnis im Jahr 1986 vergäbeni Zahl, wo der eidüütige Bezeichnig vo territoriale Einheite im Iizugsberiich vo de Schwiiz dient. S Gliiche in Düütschland und Öschterriich nännt sich Gmeindsschlüssel.

I der Regel sind das die politische Gmeinde, es chan sich aber au um Gebiet under rein kantonaler Oberhoheit (v. a. Seen) oder um sogenannti Kommunanze (gmeinsami Hoheitsrächt vo mehrere Gmeinde) handle (lueg unde).

Zu rein schtatistische Zweck sind au d Gmeinde vom Fürschtetum Liechteschtei, wie au einigi Ortschafte in Düütschland (Konschtanz südlich vom Seerhy und d Enklave Büsinge) und z Italie (d Enklave Campione) Nummere zueteilt worde. D Vergaab vo dernige Nummere begründet kein Bsitzaaspruch.