Hellenenbund

Hellenebund isch e modärni Bezäichnig für d Symmachii, wo 481 v. d. Z. vo meerere freie griechische Poleis zur Abweer gege s Riich vo de Perser gründet worde isch. Im Ganze si 31 griechischi Stedt Mitgliid gsi, usser Athen, Sparta und Korinth alli eender umbedütend. Wichdigi Stedt und Gebiet wie Argos, Thebe, Thessalie und die italische Grieche häi nid mitgmacht. Noch de Siig in de Schlachte vo Salamis (480 v. d. Z.), Plataiai (479 v. d. Z.) und Mykale (479 v. d. Z.) het sich s Bündnis, wo formal under dr Füerig vo Sparta gstande isch, afo uflööse.

Wil sich d Spartaner gwäigeret häi, dr Schutz vo de Grieche in Chläiasie z übernee, isch s 478/77 v. d. Z. zum Hegemoniiwäggsel vor Byzanz choo und zur Gründig vom attische Seebund, wo vo Athen aagfüert worde isch. Das isch dr Aafang vo dr Riwalidäät zwüsche Athen und Sparta gsi, wo schliesslig zum Peloponnesische Chrieg gfüert het.