Michelangelo Merisi da Caravaggio

Dr Michelangelo Merisi, noch em Häärkumftsort vo sine Eltere churz Caravaggio gnennt (* 29. Septämber 1571 z Mailand; † 18. Juli 1610 z Porto Ercole am Monte Argentario), isch en italiänische Mooler vom Früebarock gsi, wo sich dur sini nöiartigi und realistischi Bildgstaltig uszäichnet het. Vor allem wenn er christligi Theme behandlet het, het er s Sakraale mit em Brofaane verbunde, was e nöije Wääg gsi isch. Er gältet zämme mit em Annibale Carracci as Überwinder vom Manierismus und Gründer vo dr römische Barockmoolerei.

Scho früe noch sim Dood si Legände entstande, won er din dr „Archetüp vom verruechte Künstler“ isch. Bis hüte existiert dr „Müthos Caravaggio“ immer no. E noochhaltige Iifluss het er uf e Hufe italiänischi, niiderländischi, franzöösischi, dütschi und schbanischi Mooler vo siner Zit gha, wo zum Däil au as Caravaggiste bezäichnet wärde.