Schia

D Schia (arabisch الشيعة‎, DMG aš-šīʿa, persisch شیعه‎, šīʿa, ‚Aahängerschaft, Partei‘) isch die zwäitgröschti Konfessioon im Islam. D Aahänger vo dr Schia, d Schiite, luege dr ʿAlī ibn Abī Ṭālib, wo dr Schwiigersoon und Gusää vom Brofeet Mohammed gsi isch, as däm si designierti Noochfolger (Kalif) aa und as iire erst Imam. Noch iirem Glaube muess dr Noochfolger vom Brofeet e Noochfaar vom Ali si bzw. eme Imam, wil dä as äinzige göttlig legitimiert sig. Si löön also die drei Kalife, wo vor em Ali gweelt worde und in de Auge vo de Sunnite legitim si, nid lo gälte. Ass dr Ali 661 ermordet worden isch, vergifdet d Atmosfääre zwüsche de islamische Konfessioone bis hüte.

In de Joorhundert noch em Dood vom Brofeet Mohammed und dr Drennig vo de Sunnite isch d Dogmatik vo de Schiite witerentwigglet worde, so dass sich s schiitische Rächt in Detäi vom sunnitische Rächt underschäidet.

Hüte si öbbe fufzää Brozänt vo de Muslim schiitisch (Stand 2007, in dr Litratuur findet mä alles vo zää bis fümfezwanzig Brozänt). In dr Schia häi sich underschiidligi Ströömige bildet, wo jedi von ene iiri äigeni Zaal vo Imam het. D Staate, wo d Schiite din d Meerhäit oder en iiflussriichi Minderhäit si, wärde mänggisch under em Begriff Schiitische Halbmond zämmegfasst.