Una productora cinematografica (tamién clamada estudio cinematografico, bellas vegadas simplificau como productora u estudio) ye una interpresa por un regular de capital privau, que lo suyo obchecto social ye l'actividat d'a producción cinematografica u d'a producción audiovisual de conchunto, ye decir, que poseye los medios tecnicos adecuaus ta la filmación d'una cinta u d'una serie de teleisión. De vegadas, a mesma interpresa que fa la producción d'una cinta tamién en fa la distribución cinematografica, ye decir, o proceso a traviés d'o cual a cinta plega en una sala de cine ta la suya visión por os espectadors u en as cadenas de televisión ta la suya emisión a traviés d'a televisión.
Dende la naixencia d'o cine s'ha produciu un fenomeno de concentración d'as interpresas adedicadas a la producción, muit visible en o cine estausunidense, a on s'ha cudiu ta denominar a las grans interpresas productoras a palabra "major" (u en plural, "majors"), anglicismo que s'ha imposau en toz os idiomas. En primeras, mientres todo lo sieglo XX, a concentración d'a producción en California (mas que mas en o barrio de Hollywood en Los Angeles), a on se produciban a mayor parte d'as cintas de distribución global a toz u cuasi toz os países, permitió lo dominio mundial d'o cine estausunidense. Tanimientres, dende finals d'o sieglo XX escomencipió un fenomeno consolidau en primerías d'o sieglo XXI, amanexendo atros polos adedicaus a la producción cinematografica, mas que mas en o cine indio y en o cine chinés, amás de mantener-se en o cine europeu no nomás que los mas destacaus, como lo cine britanico, lo cine italiano, lo cine alemán, lo cine francés u lo cine espanyol, so que tamién atros cines que controlan parcialment o suyo mercau local y que gosan tener bella presencia en a distribución cinematografica en d'atros países, encara que a sobén limitada a bellas cintas que han recibiu premios en festivals cinematograficos u en premios anuals concedius por Academias de cine, asociacions cinematograficas, asociacions de criticos u atras entidaz pareixidas.
© MMXXIII Rich X Search. We shall prevail. All rights reserved. Rich X Search