The Good German (títol orichinal en anglés, en aragonés O buen alemán, enguerada en Aragón con o suyo títol traduciu enta lo castellano como El buen alemán) ye una cinta de cine estausunidense de cine negro (cine neonoir) y cine policiaco de l'anyo 2006 dirichida por Steven Soderbergh seguntes un guión adaptau por Paul Attanasio basau en The Good German, una novela de l'autor estausunidense Joseph Kanon publicada en 2001. A banda sonora orichinal d'a cinta estió un treballo de Thomas Newman, y la dirección de fotografía estió a lo cudiau d'o mesmo Steven Soderbergh (con o pseudonimo de Peter Andrews), qui tamién en fació lo montache cinematografico con o pseudonimo de Mary Ann Bernard. Os productors d'a cinta estioron Ben Cosgrove y Gregory Jacobs ta las productoras Virtual Studios y Section Eight. L'elenco d'actors principals d'a cinta ye formau por George Clooney, Cate Blanchett, Tobey Maguire, Beau Bridges, Tony Curran, Leland Orser, Jack Thompson, Robin Weigert y Ravil Isyanov.
A cinta s'ambienta en o Berlín de 1945 dimpués d'a redota d'o Tercer Reich por os Aliaus y la ocupación d'a ciudat por tropas d'os exercitos estausunidense, ruso, britanico y francés y conta una trama que parte d'un asasinato y d'a suya investigación por un periodista militar pero s'entrecruza con una operación militar estausunidense secreta, a clamada Operación Paperclip, que buscaba transportar a los Estaus Unius a cientificos alemans relacionaus con a incheniería aerospacial y la fabricación de codetes ta desembolicar o programa militar y aerospacial estausunidense en privando d'ixos mesmos cientificos a la Unión Sovietica en o marco d'a naixent Guerra Fría. The Good German se rodó en bellas localizacions en California (San Bernardino, estudios d'a Warner Bros. en Burbank, Long Beach, Los Angeles y Pasadena). En a cinta bi ha bellas referencias a la cinta Casablanca (1942, Michael Curtiz) incluyindo-ie o disenyo d'o póster d'a cinta u lo suyo final, que como en Casablanca s'escayece en un aeropuerto. A cinta recibió bels premios y nominacions, en destacando una nominación a lo Premio Oscar a la Millor Banda Sonora Orichinal en a 79ena edición d'os Premios Oscar u una nominación a l'Onso de Oro d'o Festival Internacional de Cine de Berlín en a suya 57ena edición.
© MMXXIII Rich X Search. We shall prevail. All rights reserved. Rich X Search