Alquimia

Alquimia
protociencia (es)
Ocultismu

Na historia de la ciencia, l'alquimia^[1] (del árabe الخيمياء [al-khīmiyā]) ye una antigua práutica protocientífica y una disciplina filosófica que combina elementos de la química, la metalurxa, la física, la medicina, l'astroloxía, la semiótica, el misticismu, l'espiritualismu y l'arte. L'alquimia foi practicada en Mesopotamia, l'Antiguu Exiptu, Persia, la India y China, na Antigua Grecia y l'Imperiu romanu, nel Imperiu islámicu y dempués n'Europa hasta'l sieglu XVIII, nuna complexa rede d'escueles y sistemes filosóficos que toma siquier 2500 años.

L'alquimia occidental tuvo siempres estrechamente rellacionada col hermetismu, un sistema filosófico y espiritual que tien los sos raigaños en Hermes Trimegisto, una deidá sincrética grecoegipcia y llexendariu alquimista. Estos dos disciplines influyeron na nacencia del rosacrucismo, un importante movimientu esotéricu del sieglu XVII. Nel intre de los empiezos de la dómina moderna, l'alquimia dominante evolucionó na actual química.

Anguaño ye d'interés pa los historiadores de la ciencia y la filosofía, según polos sos aspeutos místicos, esotéricos y artísticos. L'alquimia foi una de les principales precursores de les ciencies modernes, y munches de les sustancies, ferramientes y procesos de l'antigua alquimia sirvieron como pilastres fundamentales de les modernes industries químiques y metalúrxiques.

Anque l'alquimia adopta munches formes, na cultura popular ye citada con mayor frecuencia n'hestories, películes, espectáculos y xuegos como'l procesu usáu pa tresformar plomu (o otros elementos) en oru. Otra forma qu'adopta l'alquimia ye la de la busca de la piedra filosofal, cola que se yera capaz de llograr l'habilidá pa transmutar oru o la vida eterna.

Nel planu espiritual de l'alquimia, los alquimistas debíen transmutar la so propia alma antes de transmutar los metales. Esto quier dicir que debíen purificarse, preparar por aciu la oración y el ayunu.

1. ↑ Esti términu apaez nel Diccionariu de l'Academia de la Llingua Asturiana. Ver: alquimia