Importante: Esta páxina ye sospechosa de nun respetar la neutralidá nel puntu de vista. Esti avisu nun ha quitase hasta que s'esclarie na páxina d'alderique la supuesta falta de neutralidá. |
La crisis de Gaza de 2008 desencadenóse'l 23 de xineru cuando militantes de Hamás na Franxa de Gaza volaron, cerca del puestu fronterizu de Rafah, parte del muriu construyíu en 2003. La Organización de les Naciones Xuníes envaloró qu'alredor de la metá de los 1,5 millones d'habitantes de Gaza entraron n'Exiptu en busca de comida y suministros. Debíu al mieu a que los militantes pudieren adquirir armes exipcies, la policía israelina amontó'l so estáu d'alerta.[1] Dambos bandos axudicáronse la rotura de la tregua anterior.[2][3]
Exiptu cerrara'l puestu de Rafah en xunu de 2007, nos díes previos a que Hamás tomara'l control de Gaza mientres el so conflictu con Fatah.[4][5] La voladura del muriu producióse de resultes del bloquéu de la franxa per parte d'Israel, qu'empezó en parte esi mesmu xunu y siguió con amenorgamientos de los suministros de combustible a partir d'ochobre.[6] El bloquéu total empezó'l 17 de xineru de 2008, dempués d'una medría de los cohetes Qassam llanzaos dende la franxa sobre Israel.[1]
Anque Israel pidió a Exiptu que sellara de nuevu la frontera por motivos de seguridá, el presidente exipciu Hosni Mubarak ordenó a les sos tropes que dexaren cruciala pa solliviar la crisis humanitaria, al empar que verificaben que nun s'introducíen armes en Gaza. En cinco díes los gazatíes gastaron alredor de 250 millones de dólares namái na ciudá d'El Arish.[7][8] La súbita medría de la demanda de materies primes provocó un gran amonto de los precios locales y cierta escasez d'alimentos.[7]
El 24 de xineru'l Conseyu de Derechos Humanos de les Naciones Xuníes condergó a Israel per decimoquinta vegada en menos de dos años, denominando "castigu coleutivu" al bloquéu.[9] Sicasí, el procedimientu foi boicotiáu per Israel y los Estaos Xuníos. El 27 de xineru, el primer ministru israelín, Ehud Ólmert, anunció que dexaríen el suministru d'alimentos, medicines y la enerxía necesaria na franxa. Mentanto, Hosni Mubarak presentó un plan p'axuntase por separáu con representantes de Hamás y Fatah al envís de llegar a un nuevu alcuerdu sobre'l control de la frontera.[10]
El 3 de febreru'l ministru d'asuntos esteriores de Gaza, Mahmud az-Zahar, anunció que Hamás y Exiptu deseyaben cooperar nel control fronterizu ensin la supervisión israelina.[11] Dempués de la voladura'l pasu tuvo cerráu mientres once díes, sacante para los viaxeros que volvíen a la so casa.[12]
© MMXXIII Rich X Search. We shall prevail. All rights reserved. Rich X Search