Coordenaes: 12h 15m 8.718s, -58° 44′ 56.127″
Decrux o Delta Crucis (δ Cru / HD 106490) ye la cuarta estrella más brillosa na constelación de la Cruz del Sur con magnitú aparente +2,77. El términu Decrux nun ye más qu'una contraición ente la lletra griega de la so denominación de Bayer Delta y Crux, la constelación de la que forma parte.
Decrux ye una estrella blancu-azulada de tipu espectral B2IV con una temperatura de 22.550 K. La so lluminosidá, incluyida la radiación emitida nel ultravioleta, ye 5600 vegaes mayor que la del Sol. Tien una masa 8,5 vegaes mayor que la masa solar y una edá inferior a 30 millones d'años. Anque pol so espectru ta clasificada como una estrella subxigante —implicando qu'apocayá remató la fusión d'hidróxenu—, la so temperatura y lluminosidá indiquen que namái ta na metá de la so etapa de combustión d'hidróxenu, ensin que se sepa la causa d'esta anomalía.
El so tipu espectral y la distancia —unos 360 años lluz— son similares a los d'Acrux (α Crucis) y Becrux (β Crucis), y piénsase que les trés estrelles tienen un orixe común anque nun tean gravitacionalmente xuníes. Al igual que Becrux, ye una estrella variable del tipu Beta Cephei, con un pequeñu cambéu na so lluminosidá con un periodu de 3,7 hores.
Decrux figura na bandera nacional de Brasil, na que representa al estáu de Minas Gerais.
© MMXXIII Rich X Search. We shall prevail. All rights reserved. Rich X Search