Francis Ford Coppola (7 d'abril de 1939, Detroit) ye un guionista, productor y direutor de cine d'Estaos Xuníos, seis veces ganador del premiu Óscar.
Fíu del compositor y direutor de orquesta Carmine Coppola y l'actriz Italia Pennino Coppola, ingresó na Universidá Hofstra pa estudiar Artes Dramátiques, y años más sero titulóse n'Artes Teatrales na UCLA. La so carrera entamó en 1963 cola direición de Dementia 13, de la que tamién fizó'l guión. Dende eso dirixó más d'una ventena de películes, de les que delles fueron aclamaes pola crítica cinematográfica, ente les que destaquen producciones como La conversación (1974), la bélica Apocalypse Now (1979) o l'adautación al cine de la novela de Bram Stoker Drácula (1992). Ensin embargo les sos obres más reconocíes y ovacionaes son The Godfather y The Godfather Part II, dambes adautaciones del superventes homónimu del novelista italoamericanu Mario Puzo, la primera ye unu de los filmes más reconocíos y aponderaos de tolos tiempos, que lu fizo acreedor a dos nuevos premios de l'Academia pola Meyor Película y el Meyor Guión Adautáu (que compartió con Puzo por co-escribilu), mientres que la segunda ye la secuela más apreciada na cinematografía d'Estaos Xuníos (la única secuela en ganar un Óscar), cola que recibió un premiu de la Academia al Meyor Direutor.
Ta consideráu unu de los más grandes direutores de la segunda mitá del sieglu XX y unu de los más grandes de tolos tiempos, siendo The Godfather recurrentemente elixida n'encuestes como una de les meyores películes de la historia, y Apocalypse Now una de les más grandes películes de cultu nel sistema de producción de Hollywood.
Dende los sos entamos Coppola desarrolló d'igual forma la so carrera como productor, destacando los dos primeros filmes del so amigu George Lucas, THX-1138 y American Graffiti, y otres como Kagemusha, Kinsey o Sleepy Hollow.
Fuera de les lluces del séptimu arte tien actividá como viticultor, hoteleru y publicista. Ye padre del direutor de películes y videos musicales Roman Coppola y de l'actriz, direutora, productora y guionista ganadora del Óscar Sofia Coppola, asina como tíu del actor Nicholas Kim Coppola, conocíu como Nicolas Cage, hermanu de l'actriz Talia Shire y güelu de la direutora Gia Coppola.
© MMXXIII Rich X Search. We shall prevail. All rights reserved. Rich X Search