Valiato

Valiato, tamién trescritu como waliato, vilayato o vilaya (árabe: ولاية; en turcu y persa, vilayet; húngaru: vilájet) ye una subdivisión alministrativa de dalgunos países musulmanes. La pronunciación del vocablu árabe, wilāyah, en turcu ye vilayet y yera el nome de les antigües provincies del Imperiu otomanu. La pallabra suel traducise por provincia y menos vegaes por gobernación. La pallabra vien del árabe w-l-y «gobernar»: un valí (wāli), «gobernador», gobierna una wilayah, «lo que se gobierna». Sol Califatu, faía referencia a cada unu de los estaos casi soberanos.

Esisten vilayatos en munchos países, como Arxelia, Marruecos, Tunicia, Sudán, Omán y Sáḥara Occidental (anguaño so dominiu de Marruecos). Ente 1541 y 1686 esistió coles mesmes el vilayato de Buda na Hungría conquistada polos turcos otomanos, que yera'l principal dempués de los otros vilayatos húngaros de Temesvár (1552), Eger (1596), Nagykanizsa (1600), Várad (1660) y Érsekújvár (1663). Depués de ser reconquistáu polos Habsburgu, el reinu d'Hungría, que tuvo estremáu en trés partes mientres la ocupación turca, volvió unificase y los vilayatos dexaron d'esistir.

Los campos de refuxaos saḥarianos de Tindouf atópense estremaos en cuatro asentamientos, denominaos wilayas, cada unu de los cualos ta compuestu de delles daires.