Nicoya gazaxo

Teza:Ficha de estado desaparecido

Nicoya gazaxo tiyir abdieuropaf cos kereles va kipi ke tawavo ke refa Guanacaste winka valenttalte Costarika. Inafa gaderopafa is skapafa is alkafa idja tiyir Nicoya widava tigisa koe milyoltafa dega. Konaka winka is jontika wida tigisa voke Nicoya pargalu vaon rupteyed. Bak XVI^-eafa decemda, abdi artlapira ke espanik, Nicoya tiyir ano okilaxo ke valenttaltexo ke refa Costarika.^[1]

Gola ke Nicoya gejowon ice Istefa Amerika,^[2] tazukaweyer viele moni 800 RGJ gan yona kolamasa lospa mal krant ke México lentuon zo kereleyer, i gan lospa otcesa il Olmeca kofelira. Bata lospa grupenon yoltkirafa gu Chorotega va Rivas woday koe Nicaragua is tawavokipi ke Guanacaste koirubayad, pilkovon ko Nicoya dega. Va lo daref arayik malplatiyid. Azon direfa artlanira ke Nicarao saneik ko Rivas woday jupayad da Chorotega sane van loa ewala ke Nicoya pargalu is taltefa krimta ke dega va int goveliziyir. Acum va amerindafa lospa ke istexo is geexo ke Costarika toz uzeyed aze turestayad, exoneson va arayafa gluya do Istefa Amerika.

Ugon gu rawopa, tawavo ke Guanacaste tir ke rawopaxo ke Gran Nicoya tigiso male Fonseca pargalu koe Ondura kale valenttaltexo ke Costarika kene Pacifika Welfa num taltefo krimtaxo ke Nicaragua. Gran Nicoya tir dem toloy pak : lentefa gola koe Nicaragua, is geefa gola koe Guanacaste ( Nicoya dega is bostxo ke Tempisque is meftaxo ke Guanacaste jaka isu Tilarán ) koe Costarika.^[3] Nicoya gazaxo koe to bana gola tigiyir.

Koe Gran Nicoya, tadleyeso arayaxo tiyir trigafo remi mon toloya decitda.^[4][5] Rawopafa joxara nedid da selt ke Nicoya va birtafa seltafa grustara is arayekapa lajupartfir.^[6] Viele espanik bak XVI^-eafa decemda va Nicoya artlakiyid, pune va yon wid is birtafe bowere is tawamidura aptafa gu andura is yona yamba isu eba trasiyid, i va tulon bara dem jonukafa trocadayafa raba is iara va furotafa roga is raporafa muka ton amidapaf golaf martig. ^[7] Remi 1200 tanda, arayafa prostewa ke Nicoya koe Guanacaste arse tickiyir solwifi koeti. ^[8]