Dialekte in Bayern

Der Artikl is im Dialekt westlichs Nordboarisch gschriem worn.

In Bundeslånd Bayern wern gånz vaschine Dialekte gredt. De drai Haptgruppm vo de owerdaitschn Dialekte (Boarisch, Ostfrenkisch, Alemannisch (zon letztn ghejert aa es Schwebische) lejn'se dou finna und treffa'se dou. Gånz in Westn und in Nordn wern aa schou mittldaitsche Dialekte gredt. Feste Grenzn, wou a Dialektraum afhejert und a ånderer åfångt, git's niat. Ma spricht von Dialektkontinuum, des hoisst, wem'ma schrittwais vo Ort zo Ort gejt, nou endert'se da Dialekt maistns blous a kloans bissl, ower umso grejssere Schritt das'ma måcht, umso stirker unterschain'se de Dialekte. Asserdean git's Iwergångs- und Mischdialekte, und iwer d Zait hom'se a por Dialektraim aa vaschum (es Mittlboarische is nouch Nordn ins Nordboarische aine und nouch Westen ins Ostschwebische aine gwåndert, und es Ostfrenkische nouch Ostn und Sidn ins Nordboarische aine).

Wichte is aa, das bayerisch und bairisch (af Boarisch: boarisch) schraib- und bedaitungsmasse unterschin wern (in da Sprouchwissnschaft und iwerhapps):

bayerisch: betrifft es Bundeslånd Bayern.
bairisch: betrifft de boarische Sprouch. Der Tol vo Bayern, wou boarisch gredt wird, hoisst aa Altbayern (ejamol Altbaiern gschrim).