Oidbayern

Oidbayern (dt.: Altbayern oda aa Altbaiern) moand an boarischschbroching Tei vum Bundesland Bayern, wos friara Kurbayern ghoassn hod. Aussadem hoasst ma so de Leit, wo duatn wohnan.

Oidbayern is mea oda weniga deckungsgleich mid foigande Regiarungsbeziak:

• Niedabayern
• Owabayern
• Obapfoiz

De ondan Regiona vom heiting Bayern, wo ned z Oidbayern zejd san Frankn und Schwoom. De zwoa Regiona woasn spiaboare kuitureje und sprochliche Untaschiad af, wei s eascht relativ kuaz politisch z Bayern ghean. Boarische Dialekte redt ma in Oidbayern, in Frankn redt ma owa ostfränkisch und in Schwom redt ma alemannische Dialekte.

Wai da Begriff Oidbayern in da Haptsoch a kuitureje Ogrenzung gengiwa Frankn und Schwom doastejd, wean aa de Städt Wunsidl in Obafrankn genauaso wia Aichach und Friedberg in Schwoom dazuazejd, wai duatn da sejwe Dialekt und de Kuitua hoamisch san wia im Rest vo Oidbayern.

Im Boarischn Rundfunk gebds a kuituapolitische Sendung wo se "Schwaben & Altbayern" nennd, weand dera in Frankn de "Frankenschau" lafd. Im Radio gebds de sejbe Afteilung beispuisweis ba de Sendunga "Bayern 1 - Volksmusik" und "Heimatspiegel" auf Bayern 2.

In da Sprochwissnschoft wead heitzadog unta Oidbayern oda Oidbaiern da Sprochraum vastondn, wo Boarisch gredt wead, des is Owabayern, Nidabayern, de Owerpfoiz und de boarischn Gebiete, wo dro ogrenzn.^[1][2][3]

1. ↑ Ludwig Zehetner: Bairisches Deutsch, Heinrich Hugendubel Verlag/edition vulpes, Kreuzlingen/München/Regensburg, 2005, ISBN 3980702871, S. 13ff
2. ↑ Manfred Renn, Werner König: Kleiner Bayerischer Sprachatlas, Deutscher Taschenbuch Verlag, München, 2006, ISBN 3423033282, S. 18ff
3. ↑ Ludwig Zehetner: Das bairische Dialektbuch, Verlag C.H.Beck, München, 1985, ISBN 3406305628, S. 16ff